“Ноорог” медиатай холбоотой үүссэн асуудлаар тус байгууллагаас албан ёсны мэдэгдэл гаргав.

Мэдэгдэлд “Ноорог Креатив Студио ХХК-ийн 20-27 насны найман гишүүнийг 2025 оны 3 сарын 17-ны өдрөөс 18-нд шилжих шөнө Кибер гэмт хэрэгтэй тэмцэх газраас хойшлуулшгүй ажиллагаа явуулж саатуулсан. Энэ үеэр ажлын байран дээрх бүх компьютер, хард, гишүүдийн гар утас зэрэг хэвлэн нийтлэх үйл ажиллагаанд ашигладаг эд зүйлийг хураан авсан болно.

Цагдаагийн алба хаагчид ажлын байрнаас гадуур байсан 8 гишүүний байгаа газарт орж, харилцаа холбооны хэрэгслийг хурааж авсны дараа мэдүүлэг авахаар авч явсан. Өмгөөлөгчгүй мэдүүлэг өгөхөөс татгалзсан хэдий ч зарим гишүүнээс мэдүүлэг авч, 21:50 минутаас өглөөний 06:30 минут хүртэл прокуророос баривчлах зөвшөөрөл хүлээж байна гэх шалтгаанаар саатуулсан.

Энэхүү ажиллагаанд манай гишүүн нэг бүрийн хууль зүйн туслалцаа авах, мэдүүлэг өгөхөөс татгалзах эрх зөрчигдсөн гэж үзэж байна. Мөн хэрэг бүртгэлийн хэрэг үүсгээгүй байхад прокурорын зөвшөөрөлгүй ажлын байранд нэгжлэг хийж, эд зүйл хураан авсан, найман гишүүний биеэс гар утас хураан авсан, эдгээрт үзлэг хийсэн ажиллагааг хуулиар зөвшөөрсөн хэр хэмжээнээс хэтэрсэн гэж үзэж байна.

"Ноорог Креатив Студио" ХХК

Хэрэг бүртгэлийн хэрэг үүсгээгүй байгаа энэ цаг хугацаанд заавал прокурорын зөвшөөрөлтэй хийдэг үзлэг, нэгжлэг, эд зүйл хураан авах ажиллагааг фэйсбүүк хаягаар ирсэн гомдлын мөрөөр явуулсан. Мөн хэрэг бүртгэлт, мөрдөн байцаалтын шатанд хэргийн оролцогчоос гаргуулдаг нууц хадгалах баталгаанд гарын үсэг зуруулахаар танилцуулсныг өмгөөлөгчид зогсоож, татгалзсан учраас ийнхүү мэдэгдэл гаргах боломжтой үлдсэнийг мэдэгдэж байна.” гэв.

Албан ёсны мэдэгдлийг ЭНД дарж уншина уу.

“Ноорог” сайтын найман ажилтныг байцаасан асуудлаар Цагдаагийн Ерөнхий Газраас мэдээлэл хийлээ.

ЦЕГ-ын Хэвлэл мэдээллийн төвийн дарга Г.Пүрэвдэлгэр “Ноорог” сайтыг хэвлэлийн эрх чөлөө, хэвлэн нийтлэх үйл ажиллагаатай холбогдуулан шалгаагүй гэв.

Кибер гэмт хэрэгтэй тэмцэх газрын дарга С.Тайван “Хувь хүний нууцад халдах, хувь хүний нууцыг задруулах, цахим мөрийтэй тоглоом зохион байгуулах гэмт хэргийн тодорхой сэжүүр, шинж тэмдэг байсан учраас Цагдаагийн байгууллагаас холбогдох мөрдөн шалгах ажиллагааг Прокурорын хяналтанд явуулж байна.

Өчигдөр хойшлуулшгүй ажиллагааны хүрээнд прокурорт танилцуулсны үндсэн дээр найман иргэнээс холбогдох тайлбарыг авах гэсэн боловч долоон иргэний өмгөөлөгчийг байлцуулан мэдүүлэг өгөх хүсэлтийг хангаж, мөрдөн шалгах ажиллагааг 22:30 цагт эхлүүлж, өглөөний 04:30 цагт дуусгасан.

Тухайн иргэдтэй хийх уулзалтыг Кибер гэмт хэрэгтэй тэмцэх газарт хяналтын камертай орчинд явуулсан бөгөөд хууль зөрчөөгүй” гэв.

УИХ-ын гишүүн, Хууль зүй, дотоод хэргийн сайд О.Алтангэрэл “Ноорог” сайтын асуудлаар X платформоор дамжуулан мэдээлэл өглөө.

“Ноорог” сайтыг байцаасан асуудлаар УИХ-ын гишүүн С.Цэнгүүн Цагдаагийн ерөнхий газраас мэдээлэл өгөхийг шаардлаа.

Монголд өмнө нь ч энэ төрлийн гүйцэтгэх ажиллагаа явагдаж байсан. Ганц сайтын үйл ажиллагаанаас шалтгаалж, үндэсний эв нэгдэл алдагдана гэдэгт би хувьдаа итгэхгүй байна.
Мөн Эрүүгийн хуулийн 19.9.1 заалт нь Тагнуулын байгууллагын эрх үүрэгт хамаарах байтал Цагдаагийн байгууллага өөрт хамаатуулан Гүйцэтгэх ажиллагаа явуулсан нь Эрүүгийн хуулийн зөрчил болох үндэслэл харагдаж байна.
УИХ-ын гишүүний хувьд Цагдаагийн байгууллагаас “Гүйцэтгэх ажиллагаа”-тай холбоотой мэдээллийг хуулийн хүрээнд олон нийтэд өгөхийг шаардаж байна.

УИХ-ын гишүүн С.Цэнгүүн

УИХ-ын С.Цэнгүүн Цагдаагийн Ерөнхий Газрын дарга Т.Сүхболдод хандан албан бичиг хүргүүлсэн юм.

Уг албан бичигт “Монгол Улсын Үндсэн хуулийн Арван зургадугаар зүйлийн 13 дахь хэсэгт Монгол Улсын “иргэн халдашгүй, чөлөөтэй байх эрхтэй. Хуульд заасан үндэслэл, журмаас гадуур дур мэдэн хэнийг ч нэгжих, баривчлах, мөрдөн мөшгих, эрх чөлөөг нь хязгаарлахыг хориглоно. Хэн ч болов эрүү шүүлт тулгаж, хүнлэг бус, хэрцгий хандаж, нэр төрийг нь доромжилж болохгүй. Баривчилсан шалтгаан, үндэслэлийг баривчлагдсан хүн, түүний гэр бүлийнхэн, өмгөөлөгчид нь хуульд заасан хугацаанд мэдэгдэнэ. Иргэний хувийн ба гэр бүл, захидал харилцааны нууц, орон байрны халдашгүй байдлыг хуулиар хамгаална”, Иргэний болон улс төрийн эрхийн тухай олон улсын пактын 7 дугаар зүйлд “Хэнд ч эрүү шүүлт тулгаж, харгис, хүнлэг бусаар, нэр төрийг нь доромжлон харьцах буюу шийтгэхийг хориглоно. Тухайлбал, өөрийнх нь чөлөөтэй өгсөн зөвшөөрөлгүйгээр хэнийг ч эмнэлгийн буюу шинжлэх ухааны туршилтад оруулж болохгүй” гэж тус тус заасан болно. Манай улс Үндсэн хууль болон нэгдэн орж, соёрхон баталсан олон улсын гэрээгээр хүлээсэн эрхээ дээдэлж, хэнд ч эрүү шүүлт тулгахгүй байхаар Монгол Улсын иргэний өмнө хүлээсэн үүрэгтэй билээ.

Дээр дурдсан хэвлэл мэдээллийн сайтуудын мэдээллээс харахад Ноорог хуудсыг хөтлөн явуулдаг иргэдийг Монгол Улсын Эрүүгийн хуулийн 19.9 дүгээр зүйлд заасан “Үндэсний язгаварлан гадуурхах” гэмт хэрэгт сэжиглэн шалгаж байгаа талаар бичигдсэн байна. Монгол Улсын Эрүүгийн хэргийг хянан шийдвэрлэх тухай хуулийн 6.1 дүгээр зүйлд заасан Мөрдөн шалгах ажиллагаа явуулах байгууллагын харьяалалаас харвал энэ төрлийн гэмт хэргийг Тагнуулын Ерөнхий газар шалгахаар хуульчилсан байна.

Уг хойшлуулшгүй гэх ажиллагаанд Үндсэн хууль болон бусад хууль тогтоомжоор хамгаалагдсан хүний эрх зөрчигдөж байгаа эсэх, Эрүүгийн хэрэг хянан шийдвэрлэх тухай хуулийн харьяаллын дагуу мөрдөн шалгах ажиллагааг хийж буй эсэх талаар мөн энэхүү хэргийн талаар хуулийн хүрээнд олон нийт, хэвлэл мэдээлэлд тодорхой мэдээлэл өгнө үү.” гэжээ.

“Ноорог” сайтын найман ажилтныг байцаасан асуудлаар тус сайтын Гүйцэтгэх захирал О.Уламсайхан өмгөөлөгчдийн хамт мэдээлэл хийлээ.

Энэ талаар “Ноорог”-ийн Гүйцэтгэх захирал О.Уламсайхан “Биднийг эрүүгийн хуулийн 19.9.1 дүгээр хэсэг буюу Үндэсний эв нэгдлийг бусниулсан гэсэн шалтгаанаар шалгаж байна гэж мэдээлсэн. Бидний байршлыг тогтоох боломжгүй буюу ажлын бус цагаар PC тоглоомын газраас авч явсан. Гар утас зэргийг хурааж, өмгөөлөгчтэй уулзуулах боломж олгоогүй. 

Энэ газарт [Кибер гэмт хэрэгтэй тэмцэх газар] өмнө нь бид шинэ жилийн баяраар буюу 12-р сарын 31-ний өдөр ирж байсан. 

Шалгаж байгаа хэргийн тухайд гомдол гаргагч нь Кибер гэмт хэрэгтэй тэмцэх газарт чатаар хандаж, бидний бүтээдэг контентуудаас болж хүн амиа хорлох гээд байна гэж мэдүүлсэн. Бодит бус хүний нэр ашигласан. 

Ноорог-ийн Гүйцэтгэх захирал О.Уламсайхан

Шалгаж байгаа хэргийн тухайд гомдол гаргагч нь Кибер гэмт хэрэгтэй тэмцэх газарт чатаар хандаж, бидний бүтээдэг контентуудаас болж хүн амиа хорлох гээд байна гэж мэдүүлсэн. Бодит бус хүний нэр ашигласан. 

Манай байгууллагыг MCS-тэй хамтардаг гэх мэдээлэл гарсан. Монголд хэвлэл мэдээлэл, маркетингийн чиглэлээр ажиллаж байгаа бүх газар ямарваа нэгэн байдлаар MCS, АПУ, Таван богд групптэй хамтарч ажиллаж байсан. Тэднний дүрсийг авч байгаагүй газар гэж байхгүй байх. Маркетингийг ингэж л хийдэг.

Оффисоос хураасан эд зүйлсийн жагсаалтыг бидэнд өгөөгүй. Гар утас, хувийн эд зүйлсийг хурааж авсан бөгөөд хоорондоо юм ярихыг хориглосон гэв.

Энэ оны 3-р сарын 17-18-ны өдөр шилжих шөнө Кибер гэмт хэрэгтэй тэмцэх газраас хойшлуулашгүй тохиолдол үүссэн гэж "Ноорог"-ийн албан оффист нэгжлэг хийж, компьютер, хард тоног төхөөрөмж болон ажилтнуудын гар утсыг хураан авч, найман ажилтныг шөнийн 22:00-07:00 цаг хүртэл саатуулжээ.

Олон нийтэд ил болсон мэдээллээр "Ноорог" редакцыг Эрүүгийн хуулийн 19.9 дүгээр зүйлийн 1 хэсэгт заасан Үндэсний эв нэгдлийг бусниулах гэмт хэрэгт сэжиглэж, ийнхүү хойшлуулашгүй ажиллагаа явуулсан байна.

Эрүүгийн хуулийн 19.9 дүгээр зүйл:

19.9 дүгээр зүйл.Үндэсний эв нэгдлийг бусниулах

1.Хүмүүсийг үндэс, угсаа, хэл, арьсны өнгө, шашны номлол, үзэл бодлоор дайсагнуулах, эвдрэлцүүлэх, салан тусгаарлахыг ухуулсан, уриалсан, ялгаварлан гадуурхсан, хүчирхийлсэн, эрхийг нь хязгаарласан, давуу байдал тогтоосон үйлдлийг зохион байгуулсан бол таван жилээс арван хоёр жил хүртэл хугацаагаар хорих ял шийтгэнэ.

2.Энэ гэмт хэргийг зохион байгуулалттай гэмт бүлэг үйлдсэн бол арван хоёр жилээс хорин жил хүртэл хугацаагаар хорих ял шийтгэнэ.

Уг үйл явдалтай холбогдуулан "Сэтгүүл зүйн инновац хөгжлийн Үүр төв" НҮТББ-аас мэдэгдэл гаргажээ.

Үндэсний эв нэгдлийг хэвлэлийн эрх чөлөөг боомилох зорилгоор урвуулан ашиглаж байгаад "Сэтгүүл зүйн Инновац Хөгжлийн Үүр төв" НҮТББ харамсаж байгаагаа илэрхийлж, хүний эрхийг дээдэлдэг ардчилсан Монгол Улсад байж болохгүй үйлдэл гэж үзэж байгаагаа үүгээр мэдэгдэж байна.

Хэвлэл мэдээллийг дэмжих, хараат бус байдлыг нэмэгдүүлэх чиглэлээр үйл ажиллагаа явуулдаг манай байгууллага Ноорог редакцын ажлын тоног төхөөрөмжийг нэн яаралтай бүрэн бүтэн буцаан өгч, тэднийг бие даасан сэтгүүл зүйн үйл ажиллагаагаа үргэлжлүүлэн явуулах боломжоор хангахыг шаардаж байна

Сэтгүүл зүйн инновац хөгжлийн Үүр төв НҮТББ

Тус медиагийн зүгээс үйл ажиллагаагаа явуулахад хүндрэл учирсан тул өнөөдөр 12:30 цагт Цагдаагийн Кибер гэмт хэрэгтэй тэмцэх хэлтсийн гадна хэвлэлийн бага хурал зарлав.Мэдээллийг үргэлжлүүлэн хүргэнэ.